وظـــائف ــــــــــــــــ أول ماسويت حساب الفيسبوك بـ ٢٠١١ ، چنت اتصفح واقرا منشورات مضحكة عن ناس أجانب يعيشون بالخارج ويشتغلون بوظيفة ( شمام إبط ) بشركات انتاج العطور اللي چانت تأجر ناس من الشارع وتنطيهم فلوس حتى يجي هذا الموظف يظل يشمشم بـ إباطاتهم ويكتب تقريره عن كل إبـــــط وعلى أســـاس التقرير هذا يسوون مزيل التعرق الملائم !! ومنشورات ثانية عن وظائف ناس يشتغلون بحقول الدواجن حتى يفحصــــون الكتاكيت ويفـرزون الفحل من النثية ! ووظائف لناس غيرهم يشتغلون بصفة ( شمام حلــــــوگ ) بشركات انتاج معاجين الاسنان ! وظائف چنه نقراهه ونضحك عليها ونسخر منها ، وبنفس الوقت نحمد الله ونشكره على ( نعمة الاسلام ) من جهة ، وعلى مرجعياتنا الدينية العظيمة وحكوماتنا الوطنية الشريفة اللي ماوصلتنا لهاي الحالة وخلتنا نشتغل بهيچ شغلات جايفة وتلعب ستين نفس من جهة ثانية .. بعدها گمنه نسمع حچي عن أطباء يتفقون ويه عصابات تجيبلهم مخابيل حتى يسوولهم عمليات وياخذون اعضائهم البشرية .. وگمنه نشوف مدرسين يقصرون بواجباتهم التدريسية لطلابهم حتى يجبروهم ياخذون دروس خصوصية عندهم .. وشفنه موظفين يساومون عوائل الشهداء حتى يطلعولهم حقوهم ورواتبهم التقاعدية مقابل نص هاي المستحقات والرواتب المتراكمة ؟ وسمعنه عن نسوان وظائفهن الرئيسية هب غواية البنات المراهقات لتشغيلهن راقصات بملاهي بغداد .. وسمعنه عن هواي أطباء يتعاونون ويه صيادلة ويه اصحاب مختبرات حتى يقطون المريض ويرهقون كاهله بفحوصات وعلاجات مايحتاجها .. وشفنه ناس تعيش عالعلاسة ، وناس تشتري النقل للسيطرات بعشرات الالاف من الدولارات لان أقل إرهابي او مطلوب للدولة يدفعله خمس شدات مقابل السماح له بعبور السيطرة ! وشفنه موظفات يستغلن صدورهن وخلفياتهن واجسامهن المثيرة لتمشية امورهن بدوائرهن .. وشفنه ناس تعيش على بوگ المنهولات ، وطز بالطفل اللي يوكع بنصها ويموت ، او الشايب اللي يعثر بيها وينكسر حوضه وظهره .. وسمعنه عن مافيات تشغل الاف الايتام مجادية بتقاطعات الطرق وعيادات الاطباء والاماكن المزدحمة .. وشفنه شباب ( حلوين ) ينامون براس واحد قرام يحسبلهم يومية ٥٠ الف دينار من عدا ( الچقات ) الخارجية والمنا ومنا ! وشفنه محامين يعيشون عالمصايب بمراكز الشرطة وعلى حالات الطلاق اللي ملت المحاكم ، وشفنه شيوخ عشائر يعيشون عالنسبة اللي ياخذوهه من اهل المجني عليه مقابل يطلعلهم فصل بيه حظ ! بالنهاية اتوصلت انه وظيفة شمام الابط والحلوگ وفاحص الكتاكيت أشرف وانظف وأنزه من هواي وظائف عدنه اصحابها يومية أكثر من ١٠٠ مرة ارجعلي زميلي المخرج ..
الـوحـدة المسيـحـية هي تلك التي أرادها الرب يسوع المسيح (له المجد ) وما عـداها فـهي لـقاءات لأكل القوزي والتشريب والسمك المزگوف وترس البطون من غير فائدة
أقبح الأشياء أن يصبح كل شئ في الحياة جميل!! @@@@ ولا تحدثني عن الحب فدعني أجربه بنفسي @@@@ ليس بالضرورة ما أكتبه يعكس حياتي..الشخصية هي في النهاية مجرد رؤيه لأفكاري..!!
العمل/الترفيه
20/7/2022, 10:02 am
