ياجماعة الخير .. كل البلاوي من ورا هالبترول ... - أستعمرونا الأنگليز بسبب وجود البترول.. - انقلابات وأنقلابات دموية بدعم من شركات البترول -عمليات أغتيال وأبعاد وسحب الجنسية العراقية من الوطنيين بسبب هالبلوة - حركات و عصيان مسلح وتخريب بسبب البترول - أغلبية الشعوب اللي عندها ربع ما عندنا من بترول عايشة عيشة محترمة إلا أحنة كل سنة أسؤ من السنة الماضية وهكذا... - حرامية ولصوص و قشامر كانوا في ألأمس القريب واحدهم يتسكع بشوارع ايران وأوربا وحسرة عليه لفة همبرگر صار من أصحاب الملايين لابل المليارات كلها من ورا البترول.. - ناس أعرفهم واحدهم كان حافي اليوم صار يملك قنوات فضائية و أرصدة فلكية وأملاك في ايران و تركيا والخليج لابل حتى في لندن واسبانيا ويقضي العطلة على متن يخته الملوكي و يسافر هو وحاشيته بطائرات خاصة وبالمطار تنتظره كذا سيارة مرسيدس و ليموزين ورأستاَ!! الى قصره حيث الخدم بأنتظاره يسجدون أحتراما بوصلة بسلامة. منومنكم قبل الأحتلال كان سامع بهذه الأسماء الگشرة الزفرة اللي خلال هذه السنوات صار بطل الفيلم من خلال تصريحاته على الفضائيات ويتكلم بكلام كأنه يملك العراق أرضا وشعبا؟؟. ياترى هذا منو ؟؟ وابن من؟؟ وشنو أصله و فصلة؟؟.... أكيد شخص نكرة ومجهول بس شنسوي وية ألأدارة الأمريكية اللي جابت هالحثالات و فرضتها علينا بقوة السلاح.........تريد أرنب أخذ أرنب تريد غزال أخذ أرنب!!. الغريب واحدهم مايكتفي بمرة واحدة لاء ، لابد من عنده أشكال من متعة ومسيار و تسيار و عرفي و مرفي و درفي وطبعا هذني الحبايب أموزعهن على قصوره و فيلاته.. أكيد معقولة حضرة جنابة ينام وحده؟؟. يا جماعة .. يا جماعة.. راح أدعي ..ردوا وراية: اللهم آمين: - ياربي خرب معدتهم بحيث يحرمون من السمج المسگوف والشيخ محشي و الهبيط و التشريب و البرياني و الدولمة والفسنجون والمشويات والجاجيك و اللبلبي و المخللات .... - ياربي خلي واحدهم يبلع درزن حبوب الفياغرا و النتيجة .... هبياض!!!. - ياربي بليلة گشرة و هو ماخذ راحته ويه عشيقته وهومندمج وية أغنية سعد الحلي (عشگ أخضر) في أحدى قصوره لو على متن اليخت وگدامهم ما لذ وطاب من فواكه ومشروبات روحية وعلى ضؤ الشموع ( نعني جو رومانسي عالأخر) وفجأة تدخل عليهم أم الأولاد لافة عبياتها على خصرها و شايله توثية أكس لارج.. ووين ما يوجعك تظل تضرب وادك حتى تنعنع كل أضلوعه و بعدين تندار عالعشيقة ،هذه بأول توثية تسقط وتنهار و لو تعدلها للألف مادگوم!!.. وبعدين تندار عالأثاث وعالأنتيكات خلال دقائق تسويهن شذرا مذرا..نعني گرندايزر و صار عصبي..منهو يوگف گدامها؟؟. - يارب فد صاعقة بقوة مليون واط ( ليش الصاعقة تقاس بالواطات!!؟؟) على يخوتتهم بالبحر و على طائراتهم على ألأرض و على مزارعهم وقصورهم و فيللهم وخلال ثواني ..بااااااااح.. ماكو.. راحن..تعيش أنت!!. - ياربي خلي واحدهم يرجع الى ماقبل احتلال العراق.. يايابة شلون فيلم: + البارحة كان نائب رئيس وزراء، قاط ورباط ولحية خفيفة ومحبس فضة و سيارات دفع رباعي و حمايات ، اليوم تلكاه بلندن يبيع كارتات التلفونات !!. +البارحة كان وزير خارجية وقبلها رئيس وزراء .. اليوم تلگاه واگف بباب محله وشايل لافتة مكتوبة عليها : تخفيضات 30% لزوار بيت الله الحرام وأسعارنا أقل من كل المكاتب!! وشايل مكبرة صوت ينادي بالعربي لكونه ولا طگة بالأنگليزي!!. + البارحة كانت عضو برلمان ووياها درزن حماية..اليوم رجعت لشغلتها الأصلية دلالة بيع ملابس اللنگات بسوگ العورة بمدينة الثورة ..وهناك يلتمن عليها جماعتها ( حبايب أمس) و تشتغل عليها رشقات من النعال وعيونكم ما شافت شلون تنهزم من غيرعباية ونعال و فوطة والى أقرب مركز طبي من أثر الجروح بسبب نعالات دمار شامل من زميلات الأمس..( طبعا بالمركز الطبي خو مو أدكول هذه من أثر نعالات الزميلات و الحبايب،أكيدن لاء .. أدگول دعمتني سيارة الزبل!) وجيب بطن وأضحك!!...طايحة الحظ ولچ جا شلون الچ عين و ترجعينة.. بيا عين.. البارحة شايلة خشمج للسما و ماتتحجين ؟؟ بنت ......!!. + البارحة كان رئيس وزراء .. اليوم تشوفة واكف بالشام بصف مطعم مشويات ويشم الرائحة كونه جوعان وماعندة ولا ليرة!!. - البارحة كان وزير لوزارة سيادية .. اليوم واگف سرة بمدينة قم وبيده طاسة حتى ياخذ شوية شوربة يتغدى بيها!!... وبعدين يرجع المكانه وعلى الجمبر ويصيح:سيگار..افتة بگردان (جگاير حب عباد الشمس)!! - البارحة كان أمين بغداد لو وزير تجارة..اليوم لابس كشيدة وواگف بباب سيدنا ألأمام موسى الكاظم(ع) يقرأ بخت و يعقد قران للشباب دون علم الحكومة!!. يا الهي..بجاه حبيبك محمد.. اخذ كل البترول اللي بأراضي العراق.. ماعندنا مانع نزرع فجل و شلغم ..مو مهم ،المهم أن تبعد عنا هالحثالات وألأستعمار والأحتلال وحكم العساكر و التفجيرات و الطائفية ونعيش بكرامة مثل بقية شعوب المعمورة.. وينكم..كولوا: آمين يا رب العالمين.. أودعناكم اغاتي رئيس التحرير
من يقف في صف كنّا وآغجان فأنه مشارك في تهميش وإستلاب حقوق الكلدان
العمل/الترفيه
31/12/2015, 10:51 am
