متأكد وبأذن الباري ثورة العراقيين راح تنجح والشباب يحتفلون بساحة التحرير و نتخلص من كل العملاء والمأجورين وتشرق الشمس من جديد على أرض الرافدين ونبني عراقنا من جديد بسواعد الشباب و حملة الشهادات ويعود المغترب الى وطنه ليشارك ببناء الوطن وكل واحد حسب أختصاصة.
ولكن هذا كله ما يكفي اذا فر العملاء الى احضان ملالي ايران!!. لا والله أعتبر هناك شىء ناقص كودن هذولة هم اللي خربوا البلاد وسلموا كلشي وكلاشي لأسيادهم ولداعش. نعني معقولة يفرون من غير عقاب ومحكمة الشعب بساحة التحرير؟؟. الجهات المختصة تتحرك و تطلب من العراقيين جميعا ان يراقبوا الشوارع والأزقة والبيوت ويخبرون عن كل عميل ومأجور وتسليمهم الى السلطات ومحاكمتهم محاكمة عادلة. طبعا العملاء عندهم خطط للتمويه والتختل وتغيير الشخصية لفترة معينة ومن كل عقولهم من تبرد الشغلة يفرون الى ايران وكلشي ينتهي!!!. لعد شگد أغبياء أنتم.. ولكم كل العراقيين وراكم وراكم.. وين تولون ووين تنطون وجوهكم!!؟؟. تعالوا ويانا خلي انشوف خططهم وشلون أنكشفوا؟:
- قيس الخزعلي: عميل وجاسوس ايراني بأمتياز واللي يفرحنا أهالي الناصرية يعرفوا حق المعرفة من كان زعطوط الى هذا اليوم( خلوها سكتة و مو وكتها)!. يحضر مواطن شريف الى مركز الشرطة وينطي افادته: = لگيت قيس الخزعلي، عنده عربانة أمجرقعة ويبيع حلاوة الدهينة بباب الحضرة ، أمربيلة لحية وحاطلة غترة وعگال و أمغير شكله ولكن مية بالميه هو ومو غيره!!. فورا تجي مفرزة وفعلا الطول نفسه وألأرتباك واضح على حركاته. - ولك شأسمك؟؟. + أنا؟؟ - طبعا أنت لعد مني أم اللبن؟؟. = أسمي خزعل الخزعلي. - يعني انت مو قيس؟؟. = لا عمي لاء أنا رجال على باب الله.. حلاوة ياولد خوش حلاوة. - گدامنا ولك يا عميل..اخذواااا خلال ثواني ركبوا السيارة وگُبل للمركز.
نوري المالكي: لابسلة دشداشة امشگگه وحاط عرقجين على راسه و أمزين شواربه وأمكبر حواجبه طالع چنه صخلة وبيده سطلة ماي ويوزع على الرايح والجاي:
ماي سبيل ..ماي أبلاش..ماي جلااب يا ولد
وويه كل صيحة يهز رگبته شوية للدلالة على خفته و تغطية شخصيته المهزوزة. أصعد ولك أنت وسطلتك الثوار رايدين ماي بساحة التحرير.!!.
هادي العامري: تارسله بيك آب تيوتا رمان شهربان وواگف بين بعگوبة والخالص ، لابسلة دشداشة أوسخ من وجهه وغترة بيضة وعگال ويصيح: - يايابة شلون رمان.. رمان شهربان ياولد ..برخص التراب على عناد عملاء ايران واروح فدوة للثوار.. !! خوش رمان يا ولد. صعدوا بسيارته وغطوا بأكوام من الرمان خوفا من أنتقام الشباب وحتى يوصلوا بسلامة الى المحكمة.
جبر صولاغ: هذا على اساس لوتي وراح يفلت من الثوار و يخلص. عنده فندق خمس نجوم بكوردستان ، هناك أمسوي روحه بواب للمصاعد لابسلة ملابس قرقوز يشبه ملابس اللي يشتغلون بالسيرك وأمغير ملامحه. كلما شاف واحد يريد يستعمل المصعد يفتحله الباب ويتحرك بالمصعد. لكن عليمن يا أبو الدريلات؟؟ علينا؟؟ مو ملينا من سوالفكم. بأقرب وقت كبل للمطار وهناك ابغداد يستلموا الشباب!!.
محمد الحلبوسي: هذا الزعطوط ، زعطوط حتى بحركاته!!، كاعد بالگاع ولازمله ربابة ويدك ( يا ذيب ليش تعوي وحالك مثل حالي!!) أمسوي روحه مطرب البادية جبار عگار !!. ماكو خلال أقل من ساعة تعرفوا عليه ولكن المشكلة المسكين گبل ما تصل الشرطة أكل كتلة عمل شعبي وعيونكم ماشافت يمكن أكله فد الف قندرة ونعال. المهم سحلوا وركبوا بسيارة النجدة ،ومع ذلك نگدر أنكول طلع سلامات.
عالية نصيف و حنان الفتلاوي: هذني خطتهن أقوى من بقية العملاء ، رجعن الى شغلتهن الأصلية بيع ملابس اللنگة وقنادر عتگ بسوك العورة بمدينة الثورة. ظلن كم يوم وماشي الحال الى أن اجتي ساعتها ويكشفنها زميلاتهن بالعمل وعيونكم ماشافت: العباية تملخت والجرغد طار بالهوا و صارن سينما ظلن بطرگ الملابس الخفيفة وهن يركضن والنسوان والجهال وراهن ، يايابة شلون منظر الله وكيلكم يمكن ربع مدينة الثورة يتفرج عالمنظر. الأغرب وحدة شايلة چبچير وأدگول: خلنها الي وحق العباس لأملخهن باهالچبچير ، برابيچ دمترتن البلد اليوم الا اليوم وخرن اريد أبرد گليبي بيهن!!. وألأخرى شايلة (ثليثية) وأدگول :لا يا أم جبار وخري چبچيرج اليوم أريد أخرب وجوههن بهالثليثية، وخري آخ لو أكظچن يا برابيچ .. وين تروحن مني؟؟؟. أما زاير چخيور كان اله راي أخر: وخرن هذه شغلة زلم اليوم أريد أنعنع ضلوعن بهالمسحاه ، اشو وخرن ، وينكم يا الشباب كظوهن وجيبوهن العمكم چخيور والحسين لا أطلع قهري وقهر الشعب العراقي بيهن بس گبل ما تجيبوهن غطوهن بالعبي كون منظرهن يخدش الحيا!!.
خالد العطية (ابو البواسير): الشعب يتسائل: شلون صرفت 59 مليون دينار على عملية بواسيرك؟؟؟. الشعب يريد ترد المبلغ بالعملة الصعبة وبعدين محاكمتك على بقية أعمالك الدنيئة ورا ما تنزع العمامة وتحطها على صفحة. ولكم أنتم من ياملة..؟؟؟الشعب يعاني وانتو تصرفون هالملايين من غير حساب و كتاب ووجع گلب؟؟.
واثق البطاط: للأسف مالحگ الشباب يقدموا للمحكمة لأن سبقوهم شباب و مات بعد أن دحسوا قندرة حجم ٤٥ بحلگة وماكو خلال دقائق فارق الحياة والى جهنم ومزبلة التأريخ ... روح خلي يفيدوك أسيادك ملالي ايران!.
عبدالفلاح السوداني(وزير التجارة الأسبق): هذا ألأغبر سرق بحدود مليار دولار من أغذية فاسدة على اساس انها اغذية درجة اولى. هذا الأخر راد ينهزم ويدخل ايران عن طريق محافظة ديالى لكن أبناء العشائر الأبطال چتفوا وموجود عندهم بأنتظار نقله الى ساحة التحرير لينال جزائه العادل وقبل ذلك لابد أن يرجع كل اللي سرقها من البنوك خارج العراق... ملعون الوالدين لحية خفيفة ومحبسين على اساس حضرة جنابك تخاف الله .. ولكم عليمن؟؟.
كلهم راح أنجيبهم ووين يروح المطلوب النه.. والسلام. الى اللقاء في حلقة جديدة..اودعناكم عيوني.. أخوكم رئيس التحرير
الـوحـدة المسيـحـية هي تلك التي أرادها الرب يسوع المسيح (له المجد ) وما عـداها فـهي لـقاءات لأكل القوزي والتشريب والسمك المزگوف وترس البطون من غير فائدة
أقبح الأشياء أن يصبح كل شئ في الحياة جميل!! @@@@ ولا تحدثني عن الحب فدعني أجربه بنفسي @@@@ ليس بالضرورة ما أكتبه يعكس حياتي..الشخصية هي في النهاية مجرد رؤيه لأفكاري..!!
العمل/الترفيه
14/11/2019, 9:17 am
