لماذا حازت مدارس كربلاء على المرتبة الأولى بينما هبطت مدارس الموصل الى الدرجة العاشرة..؟! – الموضوع تره ماله علاقة بسنة وشيعة أعوذ بالله لتسيئون الظن..!!
2012-07-17 :: بقلم: عبودي الزهكان ::
جكليتة الزهرة.. شفاء لكل داء
ونجاح لكل طالب.للعام الثالث على التوالي تفاجؤنا وزارة التربية لحكومة نوري جواد المالكي بنتائج الدراسة الثانوية لعموم العراق.. فقد حازت محافظة كربلاء على المرتبة الأولى في التخصصات العلمية والأدبية.. وتلتها عدد من المحافظات الجنوبية في المرتبة، بينما جاءت الموصل في المرتبة العاشرة والأخيرة في تسلسل المدارس المتفوقة لهذا العام..!
أخوان أعرف بالكم راح بعيد وراسا قفزتوا الى تفسيرات طائفية اعوذ بالله.. صفوا نيتكم واقرءوا الأمور بنظرة تحليلية وستجدون أن النتائج ابداااااااا لم يتم التلاعب بها وهي تعبر بحق عن مستويات الطلبة.. وشكو بيها اذا كل الشيعة أشطر من كل السنة؟ صحيح مثلا مدارس الأنبار ولا حتى اجت بالترتيب العشرين (يكولون أكو مدارس ما طلع بيها ناجح واحد).. بس همه كسلانين شنسويلهم..!
هسه نجي للتحليل العلمي والمنطقي لتعرفوا سبب تفوق الشيعة على السنة في عموم العراق:
1. طلاب مدارس كربلاء عندهم اختراع مموجود بكل العالم اسمه (جكليتة الزهرة).. أكو معمم اسمه عبدالحميد المهاجر يكولون تافل عالجكليت فصاير مبارك وفيه شفاء من كل داء، والفلم موجود يعني مو حجي من عندي. فأكيد الطالب الكربلائي والنجفي والعمارتلي جان ياخذ جكليتة كبل الريوك وجكليته وره الغدا .. فالزهرة شفعتله وطلع معدله عالي.. انتو السنة عدكم هيجي جكليت؟ عاد هاي مشكلتكم.. دسوولكم يا حظي (حامض حلو الفاروق)..!
2. صحيح كربلاء يوميا زيارة بادية وزيارة خلصانة.. لأن كل شهر أكو إمام لو مولود لو مكتول (مسموم عادة)، وصحيح الزوار (والزايرات) الايرانيين كالبين الدنيا، وهم صحيح بمحرم والأربعينية الطالب الكربلائي ينهجم بيته وعلى الأقل فد شهرين ميعرف يدرس من وره الهوسة واللطميات ومكبرات الصوت الي تلعلع بكل دربونة.. وصحيح الطالب الكربلائي يضطر يطلع من غرفته لأن ماكو مكان للزوار بالفنادق فأهله يستضيفوهم بالبيت.. وصحيح الطالب يعني هم شاب خطية وبنات حلوات هواية بالزيارة فأكيد شوية ينشغل بالرايحة والجاية.. بس مع كل ذلك.. متعرفون الى بس يشتم غبار الحضرة المطهرة الله يغفرله وينطيه مراده؟ فأكيد الطالب الكربلائي شبعان عجاج مو غبار.. وعاد هاي انتو مشكلتكم السنة اذا ابو حنيفة مالتكم نظيف ومبيه تراب.
3. طلاب كربلاء هم أنصار الامام ويشفعلهم (بالتصليح) ليش مستغربين؟ أما انتو السنة فـ(نواصب) حتى لو طالبكم جاوب كلش زين فبقدرة (قادر) تطلع النتيجة راسب.. جا شلون هذي حوبة واقعة الطف لما جدكم يزيد كتل الامام مالتنه كبل الف سنة وبوكتها حته منظمة العفو الدولية اعترضت ودزوا على يزيد حتى يحاكموه أمام محكمة العدل الدولية بلاهاي بس موصله الايميل جان النت عاطل بدمشق ذاك الوكت..
4. ياجماعة الوكت تغير والمدن (المظلومة) أيام حكم السنة هسه تاخذ حقها.. صحيح كل المعارضة الشيعية جانوا طالعين إيفادات على حساب حكومة السنة وكلبوا صاروا معارضة، وصحيح 75% من أعضاء وقيادات حزب البعث جانوا شيعة، وصحيح من القيادات الـ50 الي أمريكا جانت تدور وراهم 35 جانوا شيعة و15 بس سنة.. بس مع ذلك الشيعة جانوا (مظلومين) وهسه يردون حقهم..
5. اي شخبصتونا بالموصل؟ صحيح طلابها مينجرعون من الحرص عالدراسة مو اليوم والبارحة من يوم قالوا بلى، وصحيح طووول عمرهم يطلعون متفوقين، بس هسه تغير الوكت وراحت عالسنة.. احنه هسه نعيش الدولة البويهية الثانية واللي ميعجبه خلي يروح وين ميروح..
17/7/2012, 9:14 pm
