Feb 22, 2013
الأخ فاروق ﮔورﮔيس الخليل، ما لك ومار باوي الجليل؟
بقـلم:
مايكـل سـيـﭙـيسـدني
قـرأتُ مقالك وتـنـفـستُ الصعـداء وحـمدتُ الرب ـ فـقـد إفـتـقـدناكَ يا رجـل، هاي وينك! من زمان نريـد نسمعـك وماكـو إنتَ. أتـذكـركَ في 2006 ـ 2007 ثم إخـتـفـيتْ، جائـز آني ما شـفـتـك أو ربما إلتـزمتَ بنـصيحة من الأخ نبـيل الـذي قال لي بحـضور البعـض في نادي الرياضة والثـقافة الآثـوري أنه راح يوَصّيك بأنْ لا تـردّ عـلى مقالاتي بشأن مار باوي، ولكـن أرجـو أن لا تعـمل بتـوصيته بل بحـريتك.
يا أخي في فـرنسا في كـل وطـن يا أخاً أحـتـرمه رغـم المحـن
إنـنــــــــي مزقـتُ أكـفان الـدجى إنـني هـدّمـتُ جـدران الوهـن ........ الـفـيـتـوري
أولاً إن المحاضرات التي أنشرها يظهـر من عـنـوانها أنها للمطران مار باوي الكـليّ الهـيـبة وليست لـشخـص بسيط مثـلي فأين أنا من سيادته؟ هاي وحـدة.
ثـنين، أقـدّرَك لمّا تـﮔـول (في ردّ بسيط ومتـواضع وإستـناداً إلى تعاليم الإنجـيل) حـلو، وإحـنا هم نـﮔـول لحـضرتـك الشيء ذاته (في ردنا البسيط والمتـواضع وإستـناداً إلى تعاليم الإنجـيل) ليش الرد مالـتـنا، معـقـد ومتكـبِّـر؟ ويستـنـد عـلى تعاليم الكـليل ومو عـلى الإنجـيل؟ يا أخ فاروق وحاشاك من العـليل؟ تـرا إحـنا هم عـلى ﮔــَـد حالـنا، إحـنا هـمّينا ناس بُـسطاء مثـلك، وما راح نستـنـد إلى كلام ــ أبو حـقي ــ إنْ كـنتَ قـد سمعـتَ به أيام زمان بشارع الرشـيد الشهـير، بل نستـنـد إلى الإنجـيل اللي أنا وأنت نؤمن به بقـوة الـقـدير، خـوش؟.
أولاً آني أشجـعـك عـلى كـتابة السجع (دليل، إنجـيل، تـضليل) حـتى آني هَـم أتشجـع وياك وأﮔـول: عـظيم والعـظـمة للرب وما نقـبل غـيره بـديل، إحـنا هَم راح نـﮔـولـَّـك كلام جَـديل بالمخـتـصر المفـيد القـليل، ورغـم أن المناخ جـميل لكـن ما يحـتاج نروح إلى روما فالطريق طـويل، خـلينا بمكانـنا وما نركـب قـطار ولا زيل وما نـريـد تـعـطـيل، وما عـلينا بالقال والقـيل لأن إحـنا ما نحـﭽـي إلاّ بالبرهان والـدليل وربَّـك كـفـيل، ولا تـنسى لّما تجـيب طاري المطران الحالي مار باوي الـنبـيل، إلـحَـﮔـْـها بـتعـبـير (جـليل) لأن روما بعـظـمتها سانـدته وتـَـوَّجَـته بإكـليل، وأتمنى حـضرتك لا تكـون مَليل، ها ... خـو مو غـيَّـرتْ رأيك يا أخي فاروق الخـليل!.
أريـدَك زلِمَة وتـشـد (تـصم) أصابع إيـدك وترفـعها بْحِـيل، حـضرتك تريد تـﮔـول أنّ القـديس ﭙـطـرس ليس أول ﭙاﭙا، طيب، ما لازم، خـليه تاسع عـشر هـسّا إرتاحـيتْ؟ وتـﮔـول أن المسيح ما يحـتاج إلى وكـلاء عـلى الأرض، هَـم نجي ويّاك خـليها بلا وكلاء، وتـﮔـول أنه لا يوجـد ذِكـْـر منصب الـﭙاﭙا في الإنجـيل، وهاذي هَـم نأيّـدك بـيها، وتـﮔـول أن الإنجـيل ما ذكـر القـديس ﭙـطرس هـو الـﭙاﭙا، وهاذي حـقـيقة ما ﭽـنـّا نعـرفها هَـم زين عـلـَّـمتـنا بـيها.
طيب إنتَ ما بَـقــّـيتْ شي، كـل اللي إفـتهـمناه منك هـو أنك تـلقي اللوم عـلى مار ﭙـطرس وكـل الصوﭺ منه لأنه ما ذكَـر عـن الـﭙاﭙا ولا ﮔال هـو الـبـديل، طيب هـسّا شـلون؟ نـﮔـعـد ونـبَـطــّـل؟ ما ضـل إلاّ نعاتب مار ﭙـولس ونـلوم مار ﭙـطـرس! ونستـنـجـد بربك الكـبـيـر.
ولكـن هـَـواشَـك! أنت تريـدها من الإنجـيل؟ خـوش، المسيح تـلـﮔاه حي بـيناتـنا وما إلـَه مثيل، وراح نشوف شـنـو اللي دا يـﮔـول، تعال ويّايَ أخـوي نقـراه عـلى ضـوء الـقـنـديل:
تـﮔـدَر حـضرتـك المحـتـرم تـﮔـولـّي شـنو معـنى قـول المسيح: أنت إذا رجـعـتَ ثـبِّـتْ إخـوانك؟؟ يا أخ فاروق الظريف؟.
تـﮔـدَر جـنابك الموقـر تـﮔـولـّي شـنو معـنى قـول المسيح: إرعَ خـرافي؟؟ يا أخ فاروق اللطـيف؟
تـﮔـدَر شخـصك الحـلو تـﮔـولـّي شـنو معـنى قـول المسيح: أنت الصخـرة وعـلى هـذه الصخـرة؟ يا أخ فاروق الـعـفـيف!!
ولكـن أوﮔـف، هاي ينرادلها وﮔـفة وصفـنة. شـنو
الصخـرة وشـنو هـذه
الصخـرة! المسيح واﮔـف يَـم مار ﭙـطـرس وبحـضور التلاميـذ ويحـﭽـي ويّاه مباشرة ويوصفه
بالصخـرة ... هاذي سهـلة وفـتهـمناها، ولكـن لمّا يأكـد مرة ثانية ﮔـبلما تـمُـر ثـواني ويـﮔـُـلـّه مباشرة بحـضور الجـميع
((وعـلى هـذه الصخـرة!!!)) فـكــِّـر ويّايَ تـرا آني هَـم دخِـتْ يا أخي، هـل كان المسيح يقـصـد بالصخـرة الثانية، حـصـواية بجـبل ألقـوش وإلاّ بدهـوك وإلاّ بـديرَتـكم؟
إذا ما فـتـهمـتها أجي ويّاك بغـير درُب .... أنا إذا قـلتُ لك مثلاً: يا فاروق، أنت رجـل شهم وعـلى هـذا الرجـل الشهم أعـتمـد في مكـتـبي! فـهـل هـذا يعـني أنْ يكـون قـصدي إنـتَ شهم فـقـط .... وإعـتمادي عـلى (شهم آخـر غـيرك)؟ الله هَم إنـطالـنا عـقـل يا فاروق. وإذا عـنـدك شرح آخـر وتريـد تشرحـه بالكـلـداني، بالآثـوري، ما عـنـدي مانع، إحـنا مشـتاقـين نسمع صوتـك، وإحـنا وِلـد الـﮔـْـرَيّة واحـد يعـرُف أخـَـيَّه.
ثم، ما هي خِـراف المسيح، هـل هي الماعـز والكـبش والأبقار بحـقـول الدواجـن وغـيره؟ إسمح لي آني دا أنـزل إلى هـذا المستـوى من الشرح. يا أخي أليس قـصد المسيح رعـيّـته، شعـبه، المؤمنين به، البشرية كـلها؟ طـيب، إشـلون وبأي طريقة تريـده مار ﭙـطـرس ينـفـذ أمر المسيح! هـل تـريـده يأخـذ ويّاه عـوﭽـيّة (ﮔـُـﭙـّالة) يركـض وراء هـذا ويهـرول وراء ذاك؟
وبعـدين، إشـلون يثـبِّـتْ إخـوانه، هـل تريـده يشـدهم بحـبل بالـوَتـد يم الخـيمة؟ يا أخي أنصحـك كأخ: ﮔـبـلما تكـتب إسأل وما بـيها عـيب وناقـش وأخــُـذ إحـتمالات وإحـتياطات، وبعـدين، ليش أنت، ما دا تعـرف إلمن دا تكـتب؟ أنت دا تكـتب إلى واحـد بسيط يريد يتعـلم، فأرجـو أنْ تعـلـِّـمنا وأنت الأستاذ.
حـضرتـك تـﮔـول أنَّ مار ﭙـطـرس ما كان بروما، لـعـد وين ﭽان، برأس الـدربونة بصف بـيتـكم؟ ليش أنتَ تـدري وين مات، وين إنـصلب، وشـلون وليش، وشـنو اللي طـلبه؟ يا أخي ليش ورّطـتْ نـفـسك وذبّـيتها في بحـر مجـهـول الأعـماق؟
وحـضرتـك تـﮔـول: لا يمكن أن نضع الـﭙاﭙا في منزلة اولئك الرسل، طـيب ولخاطـرك نعـيِّـنه ساعـور عـنـدكم، وتـﮔـول ماكـو كـرادلة، وهـذوله هَـم نحـيلهم عـلى الـتـقاعـد بس لا يضل خاطـرك.
والتلاميـذ إنـتـقـلوا من ديارنا والمسيح صعـد إلى السماء، طيب يا فاروق أنت تريـدنا نبقى تائهـين بدون مدير، بـدون قائممقام، بدون زعـيم، بدون فـورمن، ما ينرادلـنه وزير؟
زين، هـل أنت تريـد كـل واحـد وجـماعـته وينـتخـبولهم رئيس ويسَـوّولهم كـنيسة؟؟ أخاف أنت تـقـرأ بإنجـيل آخـر مو إنجـيلـنا، وهاذي كارثة؟
ثم تـرجع وتـﮔـول: ((منصب الـﭙاﭙا في كـثير من الأحـيان كان يـبقى شاغـرا بسبب الصراعات والإنقسامات التي تعـرضت لها الكـنيسة، ليس هذا فـقـط وإنما في بعـض الفـترات كان يوجـد أكـثر من ﭙاﭙا واحـد))، طيب أنت من جهة تـﮔـول تعـتمـد عـلى الإنجـيل وما تـقـبل نجـيـب ذِكـْـر الـتراث والآباء، ومن جـهة ثانية ترجـع إلى التأريخ، فـيا أخي إثبت عـلى شي واحـد حـتى نعـرف نـتـناقـش ويّاك وإلاّ راح إنتَ تـتـيه وتـَّـيِّـهـنا وياك، إرحم بحالـنا إحـنا هَم أخـوتـك.
أما عـصمة الـﭙاﭙا فـراح أشرحها إلك، إنها للأمور العـقائـدية وليس لـقـوانين المرور وضريـبة الكاربـون والإنحـباس الحـراري أو للحـروب. وأشـوفـك تعـتـرض عـلى كـلمة الطوباوي، وبْهاذي لِـﮔـَـفـناك بالنهار وإحـنا نـدَوّر عـليك بالليل، أيهـما أرقى وأعـظم، طوباوي أم قـداسة؟؟ خـلي أشرحها إلك، الطوباوي مرحـلة قـبل القـداسة، فإشـلون أنت تـﮔـول للبعـض (((قـدّيـشـوثيه))) وهـو لا يزال ليس طـوباوياً؟ ها فاروق، هاي شـلونك بـيها؟ أما طـوبى لصانعي السلام! نـﮔـول نعـم وأنت أهـل السلام، ولخاطرك نـﮔـدر نـﮔـول فاروق الطوباوي.
من جـهة أخـرى إذا تـقـصد أن هـناك كـنائس كاثـوليكـية متعـددة وكـثيرة! طيب ليش هـيّة دكاكـين خان شـغان؟ لعـد وينه المسيح الواحـد الـذي أوصى وقال: أنْ تـكـونوا واحـداً؟؟ وﮔـبلما أسـلم عـليك أﮔـول أنت كـتبتْ هاي العـبارة:
فإنه أي الـﭙاﭙا ليس شاهـد عـيان للرب يسوع المسيح
يا أبو الفـوارق، لو لا مقـص المراقـب ﭽان كـتبتـلك غـير شي، ما تـﮔـولـّي منين لك هاي المعـلومات الـدسمة؟ شـنو تـﮔـول أن الـﭙاﭙا ليس شاهـد عـيان للرب يسوع؟ ليش الـﭙاﭙا بـينـدكـتـوس الحالي، ما كان هـناك في بحـيرة طـبرية؟ وليش الـﭙاﭙا السابق المرحـوم يوحـنا ﭙـولس الثاني، ما كان عـلى الجـبل يسمع موعـظة الرب؟ ليش حـضرتك، ما كـنت هـناك؟ لازم أنت ما شـفـته!!!! أخي إنـتبه إلى كـتاباتك، ليش منو ﮔـلـَّـك أنَّ الـﭙاﭙا شاهـد عـيان للرب يسوع؟ أعـتـقـد إنتَ ما دا تعـرف شـْـدا تكـتب.
عـلى كـل حال ما أطـوّلها عـليك حـتى نـنـطـيلك فـرصة وتعـبِّـر عـن رأيك ونـقـراه حـتى نجاوبك مرة ثانية، لـذا أرجـوك أن تكـتب فآني من جانبي مشـتاق أسمع أخـبارك ولا تـنسى تسلم بطريقـك عـلى اللي ما ﮔِـدَرنا نشـوفـهم، ولا تخـلـينا نـنـتـظـر هـوايا أخـوي أخـوي، وآني والقـرّاء بإنـتـظارك، وإلك كـل الخـير.
العمل/الترفيه
23/2/2013, 8:44 am
