الدخان الأسود من صاحب الغطاء الأحمر ملاحظة وللمرة الثالثة: “عذراً من القراء الموقع الحقيقة الكرام، نرجوا أن يتحملوا اللهجة المحببة لدى صاحب الغبطة في أجزاء سلسلة الدخان الأسود،،، لأن الكيل قد طفح “ الجزء الثالث: نداء طارئ ” تمخضّ البعير فولدَ نملةً … “ بأوامر عليا عاجلة وسريعة من الزعيم القائد “الي بكل خطوة يثبت فشله اكثر فاكثر” اجتمعت الربّطة الكلدانية العليا والعالمية من كل أنحاء العالم لمناقشة قضايا الساعة الهابطة جدا، والصراعات الإقليمية والدولية.
وأخطرها قضية: + الخلاف ما بين الپطرك والمطارنة الكلدان!!! عمي صدگ تحچون! العالم وين وأنتو وين؟ منو بحالكم؟ وعساكم ما تصالحتم وناركم تاكل حطبكم . بعد اجتماع دام عشرطاعش ساعة، خرجت الربّطة المرائية على الشعب الكلداني الصابر والمؤمن بنداء استغاثة هزيل، يناشد ويتوسل الپطريرك والمطارنة بأن يبطلوا معركتهم الإعلامية ويحلّون صراعتهم بيناتهم، ويصفون القلوب، أو يضمضمون كلشي جوا الفراش، أمشيلّك هل الشغلة، وأعوفلك ذيچ، وأطيحلك هل القضية، وقعلي على البيان…. + الربّطة المرائية تقول أن الاختلاف مع الپطرك هو خروج عن طاعة الكنيسة!!! هاي شنو؟ يعني هم اختصروا كل الكنيسة بشخص الپطريرك، الزعيم القائد المهيب الدبّل ركن (حفظه الله)، اللي يمثل سيدنا يسوع المسيح على الأرض/ شتااااان بهذا التمثيل التشويهي الصرف. سؤال؟؟؟ وبقية المطارنة شنو موقعهم من الاعراب؟ يشتغلون عمّالة عند الزعيم مثلا؟ صحيح هو متعين من السوداني (مشكورا) مديرعام الكنيسة الكلدانية، بس هذوله المطارنة مو موظفين ولا عبيد عنده، لا خرّاعة خضرة ولا ط ر ا ط ي ر!!! يمعودين تره انتو فاهمين الشغلة غلط بغلط، والزعيم ما بيده شي عليهم، وهذوله المفروض مثله مثلهم! صح اكو من يرزل بيهم براحته وهمة ساكتين وأكو من مايگدرون يجرون نفس لان وبصريح العبارة (خاصيهم خصي). والمعترضين عليه مطلعهم اما متمردين أو داعمين للارهاب او (يستصغرهم) مدير ناحية او مختار مع ان بعض المدراء يسون راسك واولهم مختار قريتنا . + أما إذا راد الپطرك يسوي شي، يطلع علينا ببيان إعلامي يمشيه براس الزواجة * الي گاعدين يصفقوله بتعليقاتهم التافهة *. والبيان الهزيل ينطرح بأسلوب هجومي تحريضي على المطارنة – تالي ما تالي صارت شغلتك تشمر طوابيگ! (مو عيب عليك تنزل من مقام الكرسي الپطريركي لهل مستوى!) لاحظ اني قلت مستوى الكرسي وليس مستواك الشخصي لانه صار واضح ومعلوم لدى الجميع مستواك المنحط. مثلا :- دگول: “ان السينودس ليس مقهى” شگد عيييب بما معنى انك دتعترف بواقعكم الحالي الخزي . دگول: “اني رشحت للأسقفية من كان يختلف معي في الرأي، وذلك من باب الواجب الضميري”. نحلفك بالغالية! بس جاوب وينهم المرشحين مالتك؟ دكمل وگول طفروا من يمي كل واحد طفر لقارة حتى لايشوف خلقتك … دگول: “احد الأساقفة المعترضين، عوض ان يدعم كنيسته، راح يدعم علناً جهة سياسية“. يابه دگول اسمه وارتاح من عقدتك النفسية هاي، ترى كلنا نعرف ان هذا الاسقف بالرغم من تكبره / لكنه ناجح دبلوماسيا وكل المشكلة انه يشتغل بلا حسك وهذا الي زاعجك، لكن السؤال الي يطرح نفسه؟ سويت انت ربع الي هو سواه للأجيال القادمة؟ اذن (اگعد اعوج واحچي عدل ). دگول: “اخرون اختلفوا معي لأني لم ارضخ لطلباتهم وقراراتهم لأنها كانت تشكّل خطرا على الأبرشية”، “تصحيح بسيط ” كون صريح وغير كلمة الأبرشية بـ مصلحتي ومكانتي وريح عجرفتك . دگول: “أحد الكهنة الشباب ترك الكهنوت وتزوج ويعمل حاليا في قناة تلفزيونية تابعة لهذه الجهة / ينشر أموراً مقززة عن الپطريرك، لا أود ذكر الأسماء حماية لسمعتهم!
“شر البلية ما يضحك ” تعرف انك عكست مرضك النفسي بكل وضوح بهل نقطة ؟ ما افتهمنا بالضبط عندك اعتراض وشايل عليه حقد: لانه ترك الكهنوت؟ لانه تزوج؟ لانه يشتغل بقناة؟ لانه ينشر سوالفك المقززة؟ وتختم حالتك النفسية الزعطوطية والزواع مالتك بعبارة لا اود اذكر أسماء لحماية سمعتهم!! سمعة منو بالضبط؟ يا اخي اشفي نفسك ترى مرضتنا وياك! دگول: “التهديد بعدم حضور السينودس، حالة مؤسفة،،، فالخاسر هو المنسحب” احنا نگول تعذرنا يا ساسوكي زمانك، لان معاك القاعدة تختلف يعني “الانسحاب من المقهى مالتك حكمة ورسالة، ولكل الي ما راح يحضر خل يكول:- لا بأس أن نخسر شوفتك الگشرة من أجل أن نفوز بحفظ كرامتنا .” أما عن: أذكر في زمن مثلث الرحمات الپطريرك عمانوئيل دلي، كنا عشرة أساقفة ووو. هاي اسكت وخليها، عندي الك جواب بالمقالة الجاااية . نبشرك احنا العلمانيين كلنا دنتفرج ونضحك على هل المسرحية التافهة. ندااااء اليوم !!! يااا أصحاب الغيرة والوفاء، أحچوا ويا زعيمكم المخربط، خلي يبطل هل السوالف التعبانة، تره الناس ضاجت وملّت من ولدناته، عيب تحشيد الناس ضد هل المطران وذاك المطران، وتسقيطهم إعلاميا هذه السوالف الزبابيك مال فضائيات وما يسوها، حتى الخط الأول مال سياسي العراق اللي يشمرون بهل القنادر الواحد على الثاني، ووثاني يوم حبايب يتغدوون ويتعشوون سويّة. نأمل من خلال موقع الحقيقة هذا ان النداء الطارئ الذي اطلقناه بحرقة قلب وغضب وصدمة ان يسمعه الزعيم القائد اللي صامط أبّهاتنا بالاعلام وهو مجرد بوق فارغ، يلي يوميا شامر طوابيق على هذا وذاك، وبعد فوگاها صارت علني بالاسماء. خلي يبقي الاعلام محصور مع جماعته، لأن السالفة طلعت ريحتها، وصارت مسخرة، واليوم الناس هي الي دتعلّم الپطرك والمطارنة شلون يحلّون مشاكلهم بالتعليقات الي مدتها دقايق وتنلغي! صار المؤمن البسيط يذكرهم بالتواضع والتسامح والوحدة (هم عدكم عين وتكرزون علينا عن المحبّة والغفران؟؟؟) وأخيرا نرجع للربّطة المرائية ونگول: يكفي زحف على بابليون من جوا العباية علمود المناصب، عيب كل يومية واحد داز رسالة يبوس بيها الأيادي ويلطع الخدود، ووراها يرجع يوگف بصف الساسوكي مبتسم للصورة … بكلمة مختصرة نختمها ونگول :- “الله يساعد المؤمنين “
من يقف في صف كنّا وآغجان فأنه مشارك في تهميش وإستلاب حقوق الكلدان
العمل/الترفيه
8/7/2024, 6:38 am
